O conselleiro puxo en valor o investimento de preto de 96.000 euros nestas instalacións, que serviron para renovalas totalmente. Así, segundo explicou José González, levouse a cabo a restauración completa do interior do inmoble, creáronse catro postos de venda de produtos agroalimentarios e habilitouse un local para un supermercado.
Todo isto, engadiu o titular de Medio Rural, mediante diferentes intervencións, entre as que salientan o reforzo da estrutura con perfís de aceiro para garantir a seguridade do recinto, a instalación de carpinterías metálicas en todos os ocos exteriores, con vistas a mellorar a luminosidade ou a colocación de portas corredoiras automáticas, co fin de mellorar a eficiencia enerxética e a funcionalidade. Así mesmo, procedeuse a reforzar o illamento térmico e á dotación de pavimentación específica, para cubrir as diferentes necesidades.
Pegada de carbono
O conselleiro vinculou estas obras na praza de abastos de Crecente coas directrices europeas -e coas consecuentes políticas da Xunta- encamiñadas a reducir a pegada de carbono e destinadas a achegar aos agricultores e gandeiros, por un lado, e aos consumidores, por outro.
Así mesmo, José González sinalou que a mellora das instalacións do mercado incide tamén noutra das liñas de actuación da Consellería do Medio Rural, como é a calidade. Un aspecto que -indicou- a Xunta defende dende o control, a promoción e o apoio á comercialización, entre outros ámbitos, e que se fomenta tamén mediante medidas de ordenación, caso da futura Lei da calidade alimentaria de Galicia.
Neste sentido, o conselleiro apuntou que o feito de contar cun mercado de calidade incide tamén na defensa da excelencia dos nosos produtos alimentarios e que, de feito, dispoñer dunhas instalacións cun bo nivel constitúe un valor engadido á hora de facilitar a venda destas producións.
Por todo isto, José González quixo felicitar ao rexedor municipal e a todos os veciños de Crecente polo éxito desta rehabilitación e desexar que este mercado sirva como punto de encontro para moitos deles e para poñer en valor esa calidade dos produtos da nosa terra, remarcou.