As técnicas por imaxe médicas son determinantes á hora de diagnosticar enfermidades e calquera anomalía que ocorra no organismo. Por iso, seis entidades galllegas e cinco portuguesas asinaron este venres un acordo de cooperación transfronteirizo entre ambas as comunidades, dentro da rede Gallaecia-PET para desenvolver a tomografía por emisión de positrones ou PET, un tipo de imaxe de medicina nuclear.
O grupo de Imaxe Molecular do IDIS, liderado pola doutora Virginia Pubul, xefa de Medicina Nuclear do CHUS, e o doutor Pablo Aguiar, profesor de Radioloxía e Medicina Nuclear da USC, é un dos socios principais desta rede Gallaecia-PET en Galicia. “O IDIS é un socio central nesta rede, pois está previsto que valide boa parte desta tecnoloxía PET, que se vai a desenvolver no Hospital Clínico de Santiago”, en palabras do investigador e doutor Aguiar.
Esta rede é un acordo de cooperación entre entidades portuguesas e galegas participantes na proposta de rede de colaboración público privada Gallaecia-PET que espera recibir financiamento de fondos de desenvolvemento Interreg POCTEP. A cooperación entre socios transfronteirizos permite expoñerr grandes desafíos tecnolóxicos. “A rede Gallaecia-PET permitirá coordinar e aumentar significativamente as diferentes capacidades existentes en ambas as rexións en tecnoloxía de imaxe médica PET, desde a investigación preclínica e desenvolvemento de radiofármacos ata o seu uso clínico”, sinalan.
O acto de firma do acordo tivo lugar na Sala do Senado da Universidade de Coimbra. Alí ademais dos investigadores do IDIS e coordinadores desta rede, os doutores Pablo Aguiar e Virginia Pubul, estiveron presentes o Conselleiro de Sanidade da Xunta de Galicia, Julio García Comesaña e o Vicerreitor da Universidade de Coimbra, entre outras autoridades médicas e institucionais que asistiron ao acto.
Acordo transfronteirizo
Entre as entidades atópanse empresas e centros de investigación da eurorrexión: a Fundación Instituto de Investigación Sanitaria de Santiago FIDIS; o Centro de Investigacións en Medicina Molecular e Enfermidades Crónicas (CIMUS da USC) da Universidade de Santiago de Compostela; a Universidade de Vigo (UVigo); Galaria Empresa Pública de Servizos Sanitarios SA da Consellería de Sanidade; ATI Sistemas SA, a Universidade de Aveiro (UA), o Instituto de Ciencias Nucleares Aplicadas á Saúde (ICNAS-Pharma), o Instituto Politécnico de Coímbra (IPC), o Laboratorio de Instrumentación e Física Experimental de Partículas (LIP), Qubiotech Health Intelligence SA, e Radiation Imaging Technologies Lda. (RI-CHE).
PET e diagnóstico temperán
O PET permite diagnosticar moitas doenzas e inflamacións do organismo a través de radiación controlada. Este sistema emprega pequenas cantidades de materiais radioactivos ou radiofármacos que se inxectan no paciente; cunha cámara especial e un computador, avalíanse as funcións dos órganos e tecidos.
Esta técnica de exploración é importante no diagnóstico temperán de enfermidades e a valoración das mesmas. Mediante a identificación de cambios a nivel celular, o PET pode detectar as manifestacións temperás de enfermidades antes que outros exames por imaxes, e mesmo controlar a evolución dunha enfermidade, como pode ser o cancro, enfermidades vasculares ou doenzas inflamatorias, entre moitas outras.
Tu opinión enriquece este artículo: